மூன்று மழை பெய்யுமடா மாதம்

இன்னாளி லேபொய்மைப் பார்ப்பார் - இவர்

ஏது செய்தும் காசுபெறப் பார்ப்பார்

( மறவன் பாட்டு - 5 )

( ஏது = எதுவும் , பார்ப்பார் = அந்தணர் )

என்ற பாடல் பாரதியின் நடுவு நிலைமைப் பண்பைக் காட்டுகிறது .

கனகலிங்கம்

தாழ்ந்தகுலத்தில் பிறந்த இரா.கனகலிங்கத்தைத் தம்முடன் சேர்த்து வைத்துக் கொண்டார் .

இங்ஙனம் சாதிப்பிரிவை ஒழிக்கும் செயலில் தாமே முன்மாதிரியாக இருந்து வாழ்ந்து காட்டினார் பாரதி .

சாத்திரமா ?

சதியா ?

ஒவ்வொரு சாதிக்கும் ஒவ்வொரு நீதி சொல்லும் சாத்திரத்தைக் கண்டிக்கும் வகையில் அது சாத்திரமல்ல ‘ சதி ’ என்றார் .

சூத்திர னுக்கொரு நீதி தண்டச்

சோறுண்ணும் பார்ப்புக்கு வேறொரு நீதி

சாத்திரஞ் சொல்லிடுமாயின் அது

சாத்திரமன்று சதியென்று கண்டோம்

( உயிர் பெற்ற தமிழர் பாட்டு - ஸ்மிருதிகள்-13 )

( சூத்திரர் = அந்தணர் அல்லாதோர் , பார்ப்பு = அந்தணர் )

இவ்வாறு சாதிப் பிரிவுகளை நீக்கிச் சமூக நீதிக்கு வழிகாட்டினார் பாரதியார் .

2.4 சமய விடுதலை

இறைத் தத்துவத்தையும் ஆன்மீகத்தையும் அடிப்படையாகக் கொண்ட நெறிமுறைக் கட்டுப்பாடுகள் அகற்றப்பட்ட நிலையைக் குறிப்பது சமய விடுதலை .

சமயங்கள் எல்லாம் மனிதனை ஒன்றுபடுத்தவே தோன்றின .

ஆனால் சமயத்தின் பெயரால் மனிதர்கள் வேறுபட்டு , ஒற்றுமையின்றி இருந்தனர் .

பாரதி இதைக் கண்டு வருந்தினார் .

பாரத நாட்டு மக்களிடம் காணப்பட்ட சமயக் காழ்ப்பு ( வெறுப்பு ) உணர்ச்சி நீங்கப் பாடுபட்டார் .

எல்லோரும் தம் வேற்றுமைகளை நீக்கி ஒன்றுபட்டு வாழ்வதற்கான வழியைத் தேடினார் .

அந்த வழி அறிவென்று கண்டார் .

2.4.1 அறிவே தெய்வம்

பாரதியார் கொள்கைப்படி பார்த்தால் ‘ சமயம் ’ என்பது மக்களுக்குக் கடவுள் உணர்வை ஊட்டி அவர்களைக் கடவுள் நெறியில் நிறுத்துவது .

மக்களிடம் காணப்படும் பொறாமை , ஆசை , அறியாமை முதலியவற்றை நீக்கி அன்பு , அருள் , அறம் முதலிய நற்குணங்களைத் தருவது , மக்களைத் தெய்வத் தன்மைப் பெறச் செய்வது என்பனவாகும் .

ஆகவே , தெய்வம் பல சொல்லி வாழும் மனிதர்களைப் பார்த்து , அறிவைத் தெய்வமாகக் கொள்ள வேண்டும் என்று கட்டளையிடும் பாரதி உண்மையும் தெய்வமென்று காட்டுகிறார் .

உண்மை அறிவின் ஒரு பகுதி அல்லவா ?

ஆகவே ,

மாடனைக் காடனை வேடனைப் போற்றி

மயங்கு மதியிலிகாள் ! - எத

னூடும்நின் றோங்கும் அறிவொன்றே தெய்வமென்று

ஓதி அறியீரோ ?

( அறிவே தெய்வம் - 2 )

( மதியிலி = அறிவு இல்லாதவர் , ஓதி = சொல்லி )

என்று அறிவே தெய்வம் என்று உணர்த்துகிறார் .

அறிவின் வழி நடந்தால் பிணக்கும் , போரும் இல்லாமல் வாழலாமே !

தெய்வம் ஒன்று

உலகில் உள்ள மக்கள் அனைவரும் வணங்கும் தெய்வம் ஒன்றே .

நெருப்பை வணங்கும் அந்தணர் , மேற்குத் திசையை நோக்கி வணங்கும் இஸ்லாமியர் , சிலுவையின் முன் நின்று இயேசுவை வணங்கும் கிறித்துவர் ஆகியோர் கும்பிடும் தெய்வம் ஒன்றே .

அது எல்லாப் பொருளிலும் கலந்து நிற்கிறது .

ஒவ்வொரு மதத்தவரும் குறிப்பிடும் இறைவன் பெயர்தான் வேறுபட்டுள்ளது என்று மக்களை நல்வழிப்படுத்தும் வகையில் ,

யாரும் பணிந்திடும் தெய்வம் - பொருள்

யாவினும் நின்றிடும் தெய்வம்

பாருக் குள்ளே தெய்வமொன்று இதில் பற்பலச் சண்டைகள் வேண்டாம்

( முரசு - 13 )

என்று சண்டையில்லாமல் வேற்றுமை நீங்கி வாழ முழக்கமிடுகிறார் .

எல்லாச் சமயத்தைச் சேர்ந்தவர்களும் பாரதத் தாயின் வயிற்றில் பிறந்தவர்களே .

அவர்கள் தம்முள் சண்டை செய்தாலும் சகோதரர்கள் .

எனவே , சமய உணர்வை நீக்கி எல்லோரும் ‘ பாரதத் தாயின் மக்கள் ’ என்ற பரந்த மனப்பான்மையை வளர்க்க ஆசைப்பட்டார் .

எல்லோரும் ஒன்று

சமய வேறுபாட்டின் அடிப்படையில் இந்திய மக்களைப் பிரித்தாளும் சூழ்ச்சி செய்தனர் ஆங்கிலேயர் .

வங்காளப் பிரிவு இந்துக்களும் இசுலாமியர்களும் வேற்றுமை பாராட்ட வித்திட்டது .

சமய வேறுபாடின்றி இந்தியர்கள் ஒன்று பட்டு நின்றால் பாரதநாட்டின் பொது எதிரியான வெள்ளையர்களை இந்திய மண்ணிலிருந்து வெளியேற்ற முடியும் என்று எண்ணினார் பாரதியார் .

சாதிச் சண்டையும் , சமயச் சண்டையும் இந்திய மக்களிடம் இருக்கும் வரை தம்மை வெளியேற்ற முடியாது என வெள்ளையர்கள் எண்ணினர் .

இந்த எண்ணத்தை இந்திய மக்களுக்குத் தெரிவிக்கக் கருதிய பாரதியார் ,

ஜாதிச் சண்டை போச்சோ ? - உங்கள்

சமயச் சண்டைப் போச்சோ ?

நீதி சொல்ல வந்தாய் !

கண்முன்

நிற்கொ ணாது போடா !

( தொண்டு செய்யும் அடிமை - 2 )

( நிற்கொணாது = நிற்காமல் )

என ஒரு வெள்ளைக்காரன் இந்தியக் குடிமகனைப் பார்த்து ஏளனமாகக் கேட்பது போல் நாடக அமைப்பில் உரையாடல் அமைத்து இருப்பது சுவையான கற்பனை .

அதற்கு விடைதருவார் போல

ஆயிரம் உண்டிங்கு ஜாதி - எனில்

அன்னியர் வந்து புகல் என்ன நீதி ?

( வந்தே மாதரம் 1,3 )

என அமைத்திருப்பது பாரதியின் உள்ளத்தை வெளிப்படுத்துகிறது .

பாரதியாரின் சமயக் கொள்கை

பாரதியாரின் சமயக் கொள்கை குறித்து அவரது மாணாக்கர் ரா.கனகலிங்கம் ,

‘ சமய உணர்ச்சியைக் கொண்டே , பக்தியாகிய சக்தி ஆயுதத்தைச் சுழற்றிக் கொண்டே , வேற்றுமை உணர்ச்சிகளை வெட்டிக் களைந்து சமதர்ம விதையை ஆழமாக விதைத்துச் சிறந்த நற்பயனை விளைவித்துக் கொள்ளலாம் என்பது பாரதியார் கனவு ’ ( பாரதியார் இதயம் , பக் , 51 )

என்று கூறியிருக்கிறார் .

பாரதியார் எந்தவொரு சமயத்தையும் பெரிதெனக் கொள்ளாமல் வேற்றுமைகளுக்குள்ளே ஒற்றுமை காண முற்பட்டார் .

‘ ஸ ரி க ம ப த நி ’ என்ற ஏழும் வெவ்வேறான எழுத்துகள் .

ஆயின் அவற்றை இராகமாகப் பாடும்போது மனத்தை ஈர்க்கும் இனிய ஓசை கேட்கிறது அல்லவா ?

அதுபோல் எல்லாச் சமயங்களிலுமுள்ள சிறந்த கருத்துகளை மக்கள் உணர வேண்டும் .

அப்போதுதான் இந்தியர் இசைந்து வாழலாம் என்று நம்பினார் .

வேற்றுமையில் ஒற்றுமை காண்பது இந்த நாட்டின் தனிச்சிறப்பல்லவா ?

செயல் வீரர்

பாரதியார் சொல் வீரராக இல்லாமல் செயல் வீரராக இருந்தார் .

பிற சமயத்தவரோடு எவ்விதம் பழக வேண்டும் , அந்தச் சமயங்களை எவ்விதம் மதிக்க வேண்டும் என்பதைப் பற்றிக் கூறியது மட்டுமன்றி மற்றவர்களுக்குத் தாமே வழி காட்டினார் வாழ்ந்தும் காட்டினார் .

இயேசுவையும் , அல்லாவையும் இதயங்கனிந்து பாடித் துதித்தார் .

இந்த மகத்தான சமயப் புரட்சியைத் துவக்கிய பெருமை பாரதிக்கு உண்டு .

தாயுமானவரும் வள்ளலாரும் நடந்த பாதையில் பாரதி தம் அடிச்சுவடுகளைப் பதித்துச் செல்கிறார் .

தீயினைக் கும்பிடும் பார்ப்பார் - நித்தம்

திக்கை வணங்கும் துருக்கர்

கோயிற் சிலுவையின் முன்னே - நின்று

கும்பிடும் யேசு மதத்தார்

( முரசு - 12 )

என்று எம்மதமும் சம்மதமாகக் கொண்டு வாழ்ந்தார் .

பெயர்கள் வடிவங்கள் பலவானாலும் அவை ஒரே தெய்வத்தைக் குறிப்பிடுகின்றன என்று நம்பினார் .

ஆகையால் வேற்றுமை உணர்வின்றி எல்லா மதத்தின் கடவுளையும் பாடித் துதித்தார் .

இவ்வாறு பாரத மக்கள் சமய உணர்விலிருந்து விடுதலை பெற உழைத்தார் பாரதி . அவர் கனவு கண்ட ‘ சமதர்மக்கொள்கை ’ இந்தியாவில் வளர்ந்து பரவினால் அங்கே பேணுகின்றோம் என்கின்ற பெருமைக்கும் பீழையுறுகின்றோம் ( சார்ந்திருக்கின்றோம் ) என்ற சிறுமைக்கும் இடமிருக்காது அல்லவா ?

ஒரு நாட்டின் விடுதலை என்பது அந்நியரிடமிருந்து பெறும் விடுதலை மட்டுமல்ல .

முதலில் தம் நாட்டிற்குள் காணப்படும் தேவையற்ற கட்டுப்பாட்டுக்குள் முடங்கிக் கிடக்கும் பழக்க வழக்கங்களிலிருந்து விடுதலை பெற வேண்டும் .

அவற்றிலிருந்து விடுபட்டால் அந்நியரிடமிருந்து எளிதில் விடுதலை பெறலாம் .

இந்த நோக்கில் முதலில் பெண் விடுதலை , சாதி விடுதலை , சமய விடுதலை முதலியனவற்றைக் கூறி , இறுதியில் அரசியல் விடுதலையை வற்புறுத்துகின்றார் பாரதியார் .

2.5 அரசியல் விடுதலை

ஆங்கிலேயர் வணிகத்தின் பொருட்டு இந்தியாவிற்கு வந்தவர்கள் .

மெல்ல மெல்ல , இந்திய நாட்டின் அரசியலில் நுழைந்தனர் .

மன்னர்களுக்கு இடையே பிரிவுகளை ஏற்படுத்தினர் .

பிரிவுகளைப் பயன்படுத்தி நாட்டு அரசியலில் பங்கு பெற்றனர் .

பிறகு அரசியலில் முழுமையாக ஈடுபட்டனர் .

இவ்வாறு இந்தியா முழுவதையும் தம் ஆட்சியின் கீழ் கொண்டு வந்தனர் .

இந்திய மக்கள் அடிமைப்பட்டனர் .

அரசியலில் சுரண்டப்பட்டனர் .

இக்கொடுமையை எதிர்த்துப் போராட முன்வந்தவர்களுள் பாரதியாரும் ஒருவர் .

அந்நியராகிய ஆங்கிலேயரின் ஆட்சியிலிருந்து இந்திய மக்கள் விடுதலை பெற வேண்டும் .

அதற்கு மக்கள் என்ன செய்ய வேண்டும் என்பதைப் பற்றிப் பல பாடல்களைப் பாடியுள்ளார் .

2.5.1 ஒற்றுமை

இந்தியா சாதியின் அடிப்படையிலான சமுதாய அமைப்பு உடையது .

எனவே மக்களிடையே பல பிரிவுகள் இருந்தன .

ஒற்றுமை ( Unity ) இல்லாமல் இருந்தது .

மக்களிடையே ஒற்றுமை இருந்தால்தான் , எல்லோரும் ஓர் இனம் என்ற உணர்வு இருந்தால் தான் , அந்நியரை எதிர்க்க முடியும் என்று நம்பினார் பாரதியார் .

எனவே இந்தியர்கள் அனைவரும் ஒற்றுமையுடன் இருக்க வேண்டும் என்பது பற்றிப் பாடுகிறார் .

அந்நியரின் அரசியல் ஆதிக்கத்தால் பல துன்பங்களை அனுபவித்தனர் இந்தியர் .

இதிலிருந்து விடுதலை பெற வேண்டும் .

இதற்கு நாம் என்ன செய்ய வேண்டும் ?

அந்நியர்களை எதிர்த்துப் போராட வேண்டும் .

எவ்வாறு போராட வேண்டும் ?

ஒற்றுமையுடன் போராட வேண்டும் .

இல்லாவிட்டால் நாம் எல்லோரும் அழிந்து விடுவோம் என்கிறார் பாரதியார் .

ஆட்சியில் அமர்ந்திருக்கும் அந்நியர்கள் , நம்மைச் சுரண்டுகிறார்கள் .

அந்தச் சுரண்டலை ஒழிக்க - ஆட்சியை நீக்க ஒற்றுமையுடன் போராடுவோம் .

இல்லாவிட்டால் அழிந்து விடுவோம் என்று எச்சரிக்கிறார் .

2.5.2 அடிமை மோகம்

இந்தியர்களில் சிலர் ஆங்கிலேயரின் ஆட்சியை ஆதரித்தனர் .

ஆங்கிலேயரின் கீழ் அடிமையாக வாழ்வதையும் விரும்பினார்கள் .

ஏன் என்றால் அவர்களுக்கு ஆங்கிலேயரால் பல சலுகைகள் கிடைத்தன .

இத்தகைய அடிமைமோகம் கொண்டவர்களைப் பார்த்துப் பாரதியார் ,

என்று தணியும் இந்த சுதந்திர தாகம் !

என்று மடியும் எங்கள் அடிமையில் மோகம் ?

( சுதந்திர தாகம் , 1 )

( மடியும் = அழியும் )

என்று வினவுகிறார் .

மேலும் , அடிமை மோகம் கொண்டவர்களே , இனியாவது அந்த மோகத்தை விட்டு நாட்டு விடுதலைப் போராட்டத்தில் பங்கு கொள்ளுங்கள் என்று வேண்டுகிறார் .

அற்பமான அடிமைத் தனத்தை விரும்பி நீங்கள் பேணிப் பாதுகாத்து முன்னர் வாழ்ந்திருக்கலாம் .

அது ஓர் இழிவான செயல் என்று எண்ணி நாணம் அடையுங்கள் .

அதன் காரணமாக உங்களுக்கு வந்த இகழ்ச்சிகள் நீங்க வேண்டும் எனில் , அந்நியருக்குத் தொண்டு செய்யும் அந்த அடிமை மோகத்தைத் ‘ தூ ’ என ஒதுக்கி விடுங்கள் என்று வேண்டுகிறார் பாரதியார் .

புல்லடிமைத் தொழில் பேணிப் - பண்டு

போயின நாட்களுக்கு இனி மனம் நாணித்

தொல்லை இகழ்ச்சிகள் தீர - இந்தத் தொண்டு நிலைமையைத் தூவென்று தள்ளி .

( தேசிய கீதங்கள் , வந்தேமாதரம் , 1,6 )

( புல் , புல்லிய = அற்பமான , பேணி = பாதுகாத்து , பண்டு = பழைய / முன்னர் , தூவென்று = ‘ தூ ’ என , தள்ளி = ஒதுக்கி )

2.5.3 அஞ்சாமை

இந்தியா , அந்நியர் ஆட்சியில் இருந்து விடுதலை பெற வேண்டுமானால் , அந்நியர்களை எதிர்க்கும் துணிவு வேண்டும் .

அந்தத் துணிவைப் பெறுவதற்கு என்ன செய்ய வேண்டும் ?

எதைக் கண்டும் அஞ்சக் கூடாது .

அஞ்சாமையே துணிவைக் கொடுக்கும் .

அதனால் எதைக் கண்டும் அஞ்சாதீர்கள் என்று வேண்டுகிறார் பாரதியார் .

எனவே , கோழையாய் ( coward ) இருக்கின்றவர்களையும் , எதைக் கண்டும் அஞ்சுகின்றவர்களையும் பார்த்து ,

வலிமை யற்ற தோளினாய் போ போ போ

கிலிபிடித்த நெஞ்சினாய் போ போ போ

( நிகழ்கின்ற ஹிந்துஸ்தானமும் வருகின்ற ஹிந்துஸ்தானமும் , போகின்ற பாரதத்தை சபித்தல் - 1 )

( அற்ற = இல்லாத , கிலி = அச்சம் )

என்று கூறித் துரத்துகிறார் .

அதே நேரத்தில் வருங்கால பாரத மக்களைப் பார்த்து ,

ஒளி படைத்த கண்ணியாய் வா வா வா

உறுதி கொண்ட நெஞ்சினாய் வா வா வா

( நிகழ்கின்ற ஹிந்துஸ்தானமும் வருகின்ற ஹிந்துஸ்தானமும் , வருகின்ற பாரதத்தை வாழ்த்தல்-1 )

என்றும் அழைக்கின்றார் .

அஞ்சாமையும் துணிவும் இருந்தால்தான் அந்நியர் ஆட்சியை இந்த நாட்டிலிருந்து அகற்ற முடியும் என முழுமையாக நம்பினார் பாரதியார் .

அவர் நம்பிக்கை வீண்போகவில்லை .

அவர் வாழ்ந்த காலத்தில் கிடைக்காத விடுதலை அவருக்குப் பின்னாவது கிடைத்தமைக்கு மகிழ்ச்சியடையலாம் .

2.6 தொகுப்புரை

இந்தியப் பெரு நாட்டின் விடுதலைக்காகப் போராடிய பாரதியார் அரசியலில் நுழைந்த சூழல் , விடுதலை இயக்கத்தில் அவர் மேற்கொண்ட பணி , தீவிரவாதியாகச் செயல்பட்ட பாரதி மகாத்மா காந்தியின் அறப்போரில் ஈடுபாடு கொண்டு மிதவாதியாகத் தம்மை மாற்றிக் கொண்ட நிலை முதலியன பற்றி இப்பாடத்தில் இதுவரை படித்தறிந்தீர்கள் .

மேலும் பெண்களின் விடுதலை , பெண் உரிமை , சாதி விடுதலை , சமய விடுதலை , அரசியல் விடுதலை பற்றிப் பாரதியார் தம் பாடலில் கூறியுள்ள கருத்துகளையும் , உண்மையான விடுதலை என்பது வெறும் அரசியல் விடுதலை அல்ல ; சாதி , சமய , இன , பால் பாகுபாடுகளில் இருந்து விடுபடுவதே உண்மையான விடுதலை என்பதையும் தெளிவுபடுத்த இப்பாடத்தில் முயற்சி மேற்கொள்ளப்பட்டது .

தன் மதிப்பீடு : வினாக்கள் - II

1. பாரதி சாதிகள் இல்லையடி பாப்பா என்று குழந்தையைப் பார்த்துப் பாடியதன் காரணம் கூறுக .

[ விடை ]

2. பாரதியின் ‘ ஆறில் ஒரு பங்கு ’ என்னும் கதை எதை உணர்த்துகிறது ?

[ விடை ]

3. சமயங்கள் எதற்காகத் தோன்றின ?

[ விடை ]

4. பாரதியார் எதைத் தெய்வமென்று காட்டுகிறார் ?

[ விடை ]

5. அரசியல் விடுதலை பெறுவதற்கான சிறந்த வழி எது ?

பாரதியாரின் உலகளாவிய நோக்கு

• 3.0 பாடமுன்னுரை

பாட்டின் திறத்தால் வையத்தைப் பாலித்திட நினைத்தவர் பாரதி .

நமக்குத் தொழில் கவிதை , நாட்டுக்குழைத்தல் , கணநேரமும் சோராதிருத்தல் என்று தன் வாழ்வின் இலட்சியத்தைப் பிரகடனப்படுத்திக் கொண்டவர் .

பாரதி வாழ்ந்த காலத்தில் இந்திய நாடு அடிமைப்பட்டுக் கிடந்தது .

தாழ்வு அடைந்து , வறுமை மிஞ்சி , விடுதலை தவறி , பாழ்பட்டு நின்ற சூழல் .

நெஞ்சில் உரமின்றி நேர்மைத் திறமின்றி மக்கள் , எதைக்கண்டும் அஞ்சிய காலம் ; இத்தகைய சூழலில் பாரதி பிறந்து வளர்ந்தார் .

அவர் வளர்ந்த சூழலிலிருந்து முற்றும் மாறுபட்ட ஒரு கவிஞனாக உருப்பெற்றார் .

புதுநெறி காட்டிய பேராளனாகத் திகழ்ந்தார் .

பாரதியின் சமகாலத்துப் புலவர்களை நோக்கும்போது , பாரதியின் தனித்துவம் புலனாகும் .

ஒரு யுகக் கவிஞனாக அவர் வளர்ந்ததும் வாழ்ந்ததும் தெளிவாகும் .

அனைவர்க்கும் சொந்தமானவர்

எந்த ஒரு படைப்பாளரும் பிறந்த நாட்டிற்கு மட்டும் சொந்தமாக மாட்டார் .

அவர் உலகச் சொத்தாகக் கருதத் தக்கவர் . எந்த நாட்டில் , எந்தக் காலத்தில் , எந்தச் சமயத்தில் எந்த மொழியில் அவர் தம் படைப்பை அளித்திருந்தாலும் அவர் மக்கள் மீது அக்கறை கொண்டவராக இருப்பாரேயானால் அவர் அனைவர்க்கும் சொந்தமானவர் .