இதனால் பெரிதும் கவரப்பட்ட பாரதியார் தம் காலத்திற்குத் தேவையான கருத்துகளை ஒளவையார் போன்று புனைந்திருக்கிறார் .

சில பாடல்களில் ஒளவையாரைப் பின்பற்றியும் சில பாடல்களில் புதுமையைப் புகுத்தியும் கவிதைகளை இயற்றியிருக்கிறார் .

இது , அவர் வாழ்ந்த கால உணர்வின் எழுச்சியால் ஏற்பட்ட வேறுபாடாகும் .

பாரதியாரைப் பின்பற்றி , பாரதிதாசன் ஆத்திசூடி பாடியிருக்கிறார் .

அவருடைய எண்ணப்போக்கு வேறானது .

மூன்று ஆத்திசூடிகளும் பொருளில் வேறுபடுகின்றன .

ஏனெனில் ஒவ்வொன்றும் அந்தந்தக் காலச்சூழலைக் காட்டும் கண்ணாடியாக விளங்குகின்றன .

ஒளவையார் தம்முடைய இறைவாழ்த்துப் பாடலில் சிவபெருமானை வணங்குகிறார் .

ஆனால் சமயப் பொது நோக்குக் கொண்ட பாரதியார் , எல்லாக் கடவுளர் தம் ஆசியையும் வேண்டிப் பாடுகிறார் .

இது பல பெயர்களில் வழங்கப்படும் பரம்பொருள் ஒன்று என்ற அவருடைய மனத்தைப் பிரதிபலிக்கிறது .

கடவுள் நம்பிக்கை இல்லாத பாரதிதாசன் எந்தக் கடவுளையும் வாழ்த்திப் பாடவில்லை .

ஒளவையார் ‘ ஆறுவது சினம் ’ ( 2 ) என்று சினத்தை அடக்க வேண்டும் என்று வலியுறுத்துகிறார் .

ஆனால் பாரதியார் ‘ ரௌத்திரம் பழகு ’ ( 96 ) என்று சினம் கொள்ளத் தெரியவேண்டும் என்கிறார் .

ஒளவையார் போர்த்தொழில் புரியேல் ( 88 ) என்கிறார் .

பாரதியார் போர்த்தொழில் பழகு ( 74 ) என்று போர்முனையில் போரிட நாட்டு மக்களை ஊக்குவிக்கிறார் .

அரசியல் போரில் இந்தியா இறங்கி விட்டது .

அதிலிருந்து விலகி நிற்பதில் பயன் இல்லை , விலகி நிற்க இயலாது .

நாட்டு விடுதலைப் போரில் வீரமுடன் போராட வேண்டும் .

எனவே போர்க் கொடியை உயர்த்துமாறு பாரதியார் நாட்டு மக்களை வேண்டுவது அக்காலச் சூழலுக்குத் தேவை அல்லவா ?

ஆறுவது சினம் x ரௌத்திரம் பழகு போர்த்தொழில்புரியேல் x போர்த்தொழில்பழகு

பழ மரபை நன்குணர்ந்த பாரதியார் , அதனைக் கண்ணை மூடிக் கொண்டு பாராட்டுவதில்லை .

பயன் உள்ளதாக இருக்குமாயின் பழைய மரபை மதித்தல் வேண்டும் அல்லது அவற்றைக் கைவிடத் தயங்கக் கூடாது என்பது அவர் எண்ணம் .

பாரதியார் தாசனாக விளங்கிய பாரதிதாசன் உலகியல் கண்ணோட்டத்தில் உலகைப் பார்க்கிறார் .

அவர் இவ்வுலக வாழ்வில் மக்களுக்கு மகிழ்ச்சியான செயல் செய்தால் போதுமானது என்று எண்ணுகிறார் .

குள்ள நினைவு தீர் 17 ( தாழ்ந்த எண்ணங்களை நீக்கி விடுக ) என்றும் கைம்மை அகற்று 21 ( விதவை நிலையை நீக்கு ) என்றும் பாடுகிறார் பாரதிதாசன் .

பாரதியாரிடம் இருந்த சமய உணர்ச்சியோ உயர்ந்த அறக்கருத்துகளோ பாரதிதாசன் கொண்டிருக்கவில்லை .

அவருடைய கொள்கைகள் எல்லாம் உலகியல் வாழ்விற்குத் தேவையானதைக் குறிப்பிடுவதேயாகும் .

ஏனெனில் அவருடைய பாடல்களில் சமுதாய முன்னேற்றமே மையமாக இருந்தது .

திருப்பள்ளி எழுச்சி

பாரதியார் பாடிய பாரதமாதா திருப்பள்ளி எழுச்சி என்ற பாடல் எண்சீர் ஆசிரிய விருத்தத்தால் ஆனது .

இது மாணிக்க வாசகர் சிவபெருமானைப் பள்ளி எழுந்தருளுமாறு பாடிய திருப்பள்ளி எழுச்சி என்னும் இலக்கிய வகை போன்றது .

பாரதியார் ,

நின்னெழில் விழியருள் காண்பதற்கு எங்கள்

நெஞ்சகத்து ஆவலை நீஅறி யாயோ ?

இன்னமும் துயிலுதி யேல்இது நன்றோ ?

இன்னுயி ரேபள்ளி எழுந்தரு ளாயே !

( பாரத மாதா திருப்பள்ளி எழுச்சி - 14 )

என்று பாரத மாதாவைத் துயில் உணர்த்துகிறார் .

இப்பாடல் பாரதியின் சுதந்திர வேட்கையைக் காட்டுகிறது .

பாரத நாட்டின் அனைத்து மாநில மக்களும் சுதந்திரத்திற்காகப் போராடும் நிலையை ,

விதமுறு நின்மொழி பதினெட்டும் கூறி

வேண்டிய வாறுஉனைப் பாடுதும் காணாய்

( பாரதமாதா திருப்பள்ளி எழுச்சி - 5 )

( விதம் = வகை )

என்றும் ,

பொங்கியது எங்கும் சுதந்திர நாதம்

( பாரதமாதா திருப்பள்ளி எழுச்சி - 2 )

என்றும் விளக்குகின்றார் .

காவியம் மகாபாரதக் கதையின் ஒரு பகுதியை எடுத்துப் புதுப்பொலிவு கொடுத்துப் பாஞ்சாலி சபதம் என்ற காவியத்தை இயற்றியிருக்கிறார் பாரதி .

அது , காவியக் கதையைக் கருவாகக் கொண்டு இருந்தாலும் இந்திய நாட்டின் அரசியல் பின்னணி அதில் அடங்கி உள்ளது .

‘ பாஞ்சாலி ’யை , பாரத அன்னையாக உருவகித்துள்ளார் .

அவள் விடுதலை பெற வேண்டும் என்ற நோக்கில் அமைந்திருக்கிறது பாஞ்சாலி சபதம் .

மேலும் விரிவாக வேண்டுமெனில் பார்க்க .

( Co114 ) : பாரதியாரின் முப்பெரும் பாடல்கள் .

இவை தவிரக் கும்மி , கோணங்கி முதலிய நாட்டுப்புறப் பாடல் அமைப்பிலும் பாரதியார் பாடல்கள் இயற்றியிருக்கிறார் .

5.4.3 புது வடிவமும் பழைய பாடுபொருளும்

தமிழ்க் கவிதை உலகில் புதுமை படைத்தவர் பாரதி .

தாம் புதுமைப் படைப்பாளர் என்பதை ,

சுவை புதிது , பொருள் புதிது , வளம் புதிது ,

சொல்புதிது , சோதி மிக்க

நவகவிதை எந்நாளும் அழியாத

மகா கவிதை யென்று நன்கு

( ஓலைத்தூக்கு - 3 )

என்ற பாடலில் புதிய சுவையுடன் புதிய பொருள் கொண்ட எந்நாளும் அழியாத கவிதையைத் தாம் பாடப் போவதாகப் பாரதி குறிப்பிடுகிறார் .

பாரதியார் , சொற்களைவிடப் பாடல் உணர்த்தும் பொருளையே பெரிதாகக் கருதியதை அவருடைய பாடல்கள் காட்டுகின்றன .

பாரதியார் தமிழில் கவிப்புலமை பெற்றிருந்தது போலவே இசையிலும் புலமை பெற்று விளங்கியிருக்கிறார் .

இவருடைய பாடல்கள் சிலவற்றில் ராகம் , பல்லவி , தாளம் என்பதற்கு இவர் அத்துணையாக மதிப்பளிக்கவில்லை .

தம் பாடல்களுக்கு இவர் குறித்துள்ள ராகம் அப்பாடலின் கருத்து எந்த ராகத்தில் பாடினால் நன்றாக வெளிப்படும் என்று எண்ணிக் குறிக்கப்பட்டதாகும் .

இவ்வாறு ராகம் குறித்த முறை கருத்துத் தழுவிய புதிய முறையாகும் என்பார் வசந்தா இராமநாதன் .

( கவியுலகக் கதிரவன் பாரதி , பக். 31 )

சுயசரிதை

ஒருவர் தம் சொந்த அனுபவங்களை உணர்ச்சிப் பெருக்குடன் விவரித்துச் சொல்வது சுயசரிதையாகும் .

தமிழிலே பலர் சுயசரிதையை எழுதியிருக்கின்றனர் .

அவர்கள் தம் சுய சரிதையை வெளியிட மேற்கொண்ட வடிவம் உரைநடையாகும் .

ஆனால் பாரதியோ தம் சுயசரிதையைக் கவிதை வடிவில் தந்திருக்கிறார் .

சுயசரிதையைக் கவிதை வடிவில் பாடிய முதல் கவிஞர் பாரதி தான் என்பார் சிலம்புச் செல்வர் மா. பொ. சிவஞானம் ( பாரதியாரின் பாதையிலே , பக் : 75 ) இது ஆசிரியப்பாவின் இனமான ஆசிரிய விருத்தத்தால் ஆனது : ஒவ்வொரு அடியிலும் எட்டுச் சீர்கள் உள்ளன .

49 பாடல்களைக் கொண்டது .

பெரும்பான்மையான சுயசரிதைகளில் எழுதுபவரின் வாழ்க்கையில் நடந்த நிகழ்ச்சிகளே காணப்படும் .

ஆனால் பாரதியாரின் சுயசரிதையின் மூலம் அந்நியர் ஆட்சியின் விளைவால் தனிமனிதனுக்கு ஏற்பட்ட பொருளாதார இழப்பு , சமுதாய நிலை முதலியனவற்றை அறிந்து கொள்ள முடிகிறது .

பார்க்க ( C0111 : பாரதியாரின் வாழ்க்கைச் சித்திரம் ) சுயசரிதையில் , கனவு , முன்னுரை , பிள்ளைக்காதல் , ஆங்கிலப் பயிற்சி , மணம் , தந்தை வறுமை எய்திடல் , பொருள் பெருமை , முடிவுரை ஆகிய தலைப்புகளின் கீழ் கருத்துகள் இடம் பெற்றுள்ளன .

பாரதியாரின் தந்தை ஒரு பருத்தி அரவை ஆலை தொடங்கினார் .

ஆங்கிலேயருடன் போட்டியிட முடியாமல் அவர் தோல்வி அடைந்து பணத்தை இழந்த நிலையை ,

ஈங்கு இதற்கிடை எந்தை பெருந்துயர்

எய்தி நின்றனன் தீய வறுமையால்

ஓங்கி நின்ற பெருஞ்செல்வம் யாவையும்

ஊணர் செய்த சதியில் இழந்தனன்

( சுயசரிதை -39 )

( ஊணர் = ஆங்கிலேயர் )

என்று விளக்குகிறார் .

ஆங்கிலேயரின் ஆதிக்கம் நாட்டை மட்டுமன்றித் தனி நபரையும் பாதித்ததைக் காட்டுகிறது .

தாய்மொழி மறந்து ஆங்கில மொழி நாட்டு மொழியாகி அதைக் கற்க வேண்டி வந்த நிலையை நினைத்து ,

நெல்லையூர் சென்றவ் வூணர் கலைத்திறன்

நேரு மாறென எந்தை பணித்தனன்

( சுயசரிதை - 21 )

என்று வருந்துகிறார் பாரதி .

பாலருந்தும் பருவத்துக் குழந்தைகளை மணம் செய்து கொடுக்கும் கொடுமையைச் சாடுகிறார் ( சுயசரிதை .

34 )

அவருடைய தந்தை போனபின் அவர் குடும்பத்தில் வறுமை சூழ்ந்தது . அப்போது பொருளின் தேவையை உணர்ந்த பாரதி ‘ பொருளி லார்க்கிலை இவ்வுலகு ’ ( 43 ) என்ற வள்ளுவர் கூற்றை நினைவு கூர்கிறார் .

இங்ஙனம் பாரதியின் சுயசரிதை அவருடைய வாழ்க்கைப் பின்னணியை மட்டுமன்றி , அக்காலச் சமுதாயத்தைப் பற்றியும் விளக்குகிறது .

5.4.4 புது வடிவமும் புதுப்பாடுபொருளும்

வசன கவிதை

தமிழ்க் கவிதை உலகில் புரட்சிகரமான முறையில் ‘ வசன கவிதை ’ என்னும் ஒரு புதிய கவிதை வடிவத்தைப் பாரதியார் அறிமுகம் செய்கின்றார் .

இது உரைநடையுமல்லாமல் செய்யுள் நடையுமல்லாமல் ஆங்கில வசன கவிதையை ( blank verse ) ஒட்டியது .

இதற்கு மூலமாகவும் தூண்டுதலாகவும் அமைந்தது அமெரிக்கக் கவிஞரான வால்ட் விட்மனின் புல்லின் இதழ்கள் ( Leaves of grass ) என்ற கவிதையாகும் .

வசன கவிதை சந்தயாப்பு எதுவும் இல்லாமல் உரைநடைச் சொற்களை அடுக்கி அமைத்த வடிவமாகக் காணப்படுகிறது .

இது இக்காலத்துப் புதுக் கவிதையின் அமைப்பில் உள்ளது .

புதுக்கவிதைக்கு வித்திட்டவர் பாரதி எனக் கொள்ளலாம் .

வசன கவிதையில் காட்சி , சக்தி , காற்று , கடல் , ஜகத் சித்திரம் , விடுதலை , தந்தையும் மகனும் கடவுளும் என்ற தலைப்புகள் பாடுபொருள்களாக விளங்குகின்றன .

கடல் , காற்று முதலியவை பற்றிக் காப்பிய இலக்கியங்கள் கூறினாலும் அவற்றின் சக்தி முதலியவை பற்றி பாரதி போல் வேறு யாரும் பாடியதில்லை .

மேலும் , அவர் தத்துவக் கருத்துகளையும் ஆங்காங்கே கூறிச் செல்கிறார் .

பாரதியார் , காட்சி என்ற தலைப்பில் இன்பம் , ஞாயிறு என்னும் இரு பிரிவுகளைக் கூறி , உலகமும் உலகில் உள்ள அனைத்தும் இன்பம் பயப்பது என்று காட்டுகிறார் .

அதற்குச் சான்றாக ,

உணர்வே , நீ வாழ்க , நீ ஒன்று , நீ ஒளி

நீ ஒன்று , நீ பல

நீ நட்பு நீ பகை

நன்றும் , தீதும் நீ

நீ அமுதம் , நீ சுவை , நீ நன்று , நீ இன்பம்

( வசன கவிதை , காட்சி , இன்பம் : 7 )

என்னும் பாடல் விளங்குகிறது .

ஞாயிறு உலகிற்கு ஒளியும் வெம்மையும் மட்டுமன்றி மழையும் பொழிவதைக் காட்டுகிறார் பாரதி .

தமிழ் இலக்கியங்களில் ஞாயிறு பற்றிய செய்திகள் பல கோணங்களில் கூறப்பட்டுள்ளன .

உயிர் வாழ ஞாயிற்றின் ஒளி தேவை .

பாரதி ஞாயிறு பற்றிக் கூறுவதைக் கேளுங்கள் .

ஞாயிறு ,

நீ ஒளி , நீ சுடர் , நீ விளக்கம் , நீ காட்சி

மின்னல் , இரத்தினம் , கனல் , தீக்கொழுந்து

இவையெல்லாம் நினது நிகழ்ச்சி ,

நீ சுடுகின்றாய் , வாழ்க ; நீ காட்டுகின்றாய் வாழ்க

உயிர் தருகின்றாய் உடல் தருகின்றாய் !

நீர் தருகின்றாய் , காற்றை வீசுகின்றாய் , வாழ்க !

( வசன கவிதை , ஞாயிறு-2 )

என்றெல்லாம் ஞாயிற்றின் குணங்களை எளிமையாகக் குறிப்பிடுகிறார் .

கடலைப் பற்றிப் பாடும் போது பாரதி அதன் அளப்பரிய ஆற்றலைக் காட்டுகிறார் .

முதல் அடியில் ,

கடலே காற்றைப் பரப்புகின்றது .

காற்று இல்லையேல் உலகில் உயிர்கள் வாழ இயலாது .

அந்தக் காற்றை இயக்கும் மிகப் பெரிய ஆற்றல் கடலுக்கு உண்டு .

கடலில் இல்லாத ஆற்றலே இல்லை .

எனவே , பாரதி அதை , ‘ உயிர்க்கடலில் இருந்து எங்களுக்கு நிறைய உயிர் மழை கொண்டு வா ’ என்று காற்றைக் கேட்கிறார் .

கடலில் உள்ள அலைகள் கரைப்பகுதியை நோக்கி வரும்போது அவை திரட்டிக் கொண்டு வருகிற சக்தி , அளவிடற்கரியது .

அது நுகரப்படாத திறன் ( untapped potential ) ஆகும் .

அத்தகைய திறன் இருப்பதால்தான் அது காற்றை இயக்குகிறது போலும் !

கடல் நீரின் மேற்பரப்பில் படுகிற கதிர் வீச்சால் கடல்நீர் கொதிப்படைகிறது .

சூரிய வெப்பத்தைக் கடல் பரப்புச் சேமித்து வைக்கிறது .

கொதிப்படைந்த கடல் நீர் , நீராவியாக மாறி உலகைக் காக்கும் மழையாகப் பொழிந்து அனைத்து உயிர்களையும் வாழ வைப்பதால் ‘ உயிர் மழை ’ என்று அழைக்கிறார் பாரதி .

ஞாயிறு , சக்தி , காற்று , கடல் முதலியவை ஆற்றல் உள்ளவை .

ஆற்றல் உள்ள அனைத்தும் உயிருடையவை என்பது பாரதியின் எண்ணம் . ஆகவே ஞாயிறு , சக்தி முதலியவற்றிற்கு உயிர் உண்டு .

ஜகத் சித்திரம் என்னும் தலைப்பில் உள்ள வசன கவிதையில் உலகில் உள்ள வானம் , மலை , குயில் , கிளி முதலியன இன்பமாக இருக்க மனம் மட்டும் துன்பமாக இருப்பதைக் கூறிக் கலங்குகிறார் .

அதை மாற்ற விரும்பி அவர் பறவைகளை அழைப்பது , எல்லோரும் இன்புற்று இருக்க வேண்டும் என்று அவர் விரும்பியதைக் காட்டுகிறது .

ஸர்வ நாராயண ஸித்தாந்தத்தின் முடிவு எல்லாம் ஒன்றுக்கொன்று சமம் என்பதை எடுத்துரைக்கிறார் .

உலகில் தற்கொலை செய்வது பெரிய குற்றம் என்பதையும் கூறிச் செல்கிறார் பாரதி .

இவ்வாறு வசன கவிதையில் பாரதி புதுமையைப் புகுத்தியிருப்பதை நீங்கள் காணலாம் .

5.5 பாரதி காட்டிய பாதையில்

இருள் மூடிக்கிடந்த இந்திய நாட்டுக்கு ஒரு விடியலாக இருந்தது பாரதி காட்டிய பாதை .

அப்பாதையில் நடைபயின்ற பாரதிதாசன் , கவிமணி தேசிக விநாயகம் பிள்ளை , நாமக்கல் கவிஞர் இராமலிங்கம் பிள்ளை முதலியவர்கள் குறிப்பிடத்தக்கவர் ஆவர் .

ஒன்றிலிருந்து ஒன்று தோன்றுவது உண்மை .

பாரதியாரில் இருந்து உருவானவர் பாரதிதாசன் .

பாரதி , தம்மை வந்து வணங்கிய பாரதிதாசனை ‘ எழுக நீ புலவன் ’ என்று வாழ்த்தினாராம் .

தமக்குப் பாதை காட்டியவர் பாரதி என்பதை ,

சுப்பிரமணிய பாரதி தோன்றியென்

பாட்டுக்குப் புதுமுறை புதுநடை காட்டினார்

( புரட்சிக் கவிஞர் பாவேந்தனார் : வாழ்த்து )

என்று பாரதிதாசன் குறிப்பிட்டிருக்கிறார் .

5.5.1 வழிபாடு

சக்தி வழிபாட்டில் மிகுந்த ஈடுபாடு கொண்டவர் பாரதி .

முற்போக்கான கருத்துகள் பல கூறினாலும் , தம் தேவைகளை நிறைவேற்றப் பராசக்தியிடம் வேண்டி நிற்கும் பழமை வாதியாகவே விளங்குகிறார் .

பாரதியிடம் கொண்ட பற்றால் பாரதிதாசனும் முதன்முதலில் " எங்கெங்கு காணினும் சக்தியடா " என்று பாடியிருக்கின்றார் .

பாரதி , பாரதிதாசன் இவர்களைப் போல் கவிமணியும் தம் கிராமத்தில் எழுந்தருளியிருக்கும் அழகம்மையைப் போற்றிப் பாடியிருக்கிறார் .

5.5.2 தேசம்

பாரதியைச் சிறந்த தேசிய கவிஞராக உலகுக்கு அறிமுகப்படுத்தியதே தேசியப் பாடல்கள்தாம் .

அவை பிற கவிஞர்களுக்கு வழிகாட்டியாக விளங்கின .

பாரதிதாசன் தேசியப் பாடல்கள் பாடியிருப்பினும் அதை விட மிகுதியாக மக்களாட்சி , அதன் இயல்பு இவை பற்றியே பாடியுள்ளார் .

பாரதிதாசன் வாழ்ந்த காலத்தில் இந்தியா சுதந்திரம் அடைந்து விட்டது .

சுதந்திரம் பெறுவதற்கு முன்பு சுதந்திரம் அடைந்து விட்டதாகக் கற்பனை செய்து பாரதி பாடியது போல் பாரதிதாசனும் கி.பி.1950-இல் இந்தியா குடியரசு நாடு என்று அறிவிப்பதற்கு முன்பே இந்தியாவில் மக்களாட்சி மலர வேண்டும் என்று விரும்பிக் கவிதைகள் இயற்றியிருக்கிறார் .

அதன் அடிப்படையில் தான் அவருடைய படைப்புகளான கடல் மேல் குமிழிகள் , வீரத்தாய் , புரட்சிக்கவி , பாண்டியன் பரிசு முதலியவை விளங்குகின்றன .

கீழே இடம் பெறும்

நாட்டினிலே குடியரசு நாட்டி விட்டோம்

இந்நாள் நல்லபல சட்டங்கள் அமைத்திடுதல் வேண்டும்

( கடல் குமிழிகள் , அடி-409 , 410 )

என்ற பாடல் மக்களாட்சியின் தேவையை , சிறப்பை உணர்த்துகிறதல்லவா ?

மேலும் ,

எல்லார்க்கும் தேசம் எல்லார்க்கும் உடைமை எலாம் எல்லார்க்கும் எல்லா உரிமைகளும் ஆகுகவே

( வீரத்தாய் - அடி 256,257 )

என்னும் பாடலடிகள் நாட்டில் ஏற்றத் தாழ்வின்றி அனைவரும் சமம் , என்ற பொதுவுடைமைக் கருத்தை அவர் வலியுறுத்துவதைக் காட்டுகின்றன .

இமயம் முதல் குமரிவரை அலையடித்துப் பொங்கியது போன்ற தேசிய விடுதலைப் போராட்டம் பற்றிக் கவிமணி மிகுதியான பாடல்கள் பாடவில்லை .

இதற்கான காரணம் உண்டு .

கவிமணி வாழ்ந்த குமரி மாவட்டம் திருவிதாங்கூர் சமஸ்தானத்துக்குட்பட்டது .

இங்குப் பண்டைச் சேர மரபின் சந்ததியினர் ஆட்சி செய்தினர் .

அவர்கள் வெள்ளையருக்குத் திறை செலுத்தி வந்த போதிலும் வெள்ளையரின் நேரடியான ஆதிக்கம் திருவிதாங்கூரில் இல்லை .

மன்னர்கள் குடிமக்கள் நலனில் அக்கறை கொண்டு வாழ்ந்தனர் .

ஆகவே , இந்தியாவின் பிற பகுதிகளில் ஏற்பட்ட அளவுக்கு விடுதலைப் போராட்டம் திருவிதாங்கூர் சமஸ்தானத்தில் ஏற்படவில்லை .

எனவே , கவிமணி , தேசியப் பாடல்கள் மிகுதியாகப் பாடவில்லை போலும் .

இருப்பினும் வ. உ. சிதம்பரம் பிள்ளை சிறை சென்றதை ,

- ஐயன்

சிதம்பரம் அன்று சிறை

சென்றிலனேல் , இன்று சுதந்திரம் காண்பாயோ