[ விடை ]
4. பாரதியின் முன்னால் பாரதிதாசன் எந்தப் பாடலை இயற்றிப் பாடினார்?
1.4 சுயமரியாதை உலகில் E
பெரியாருடன் பாரதிதாசன்
காங்கிரஸ் இயக்கத்தில் பெரும் பங்கு பெற்றிருந்த பெரியார் ஈ.வெ.இராமசாமி , சேரன்மாதேவி குருகுலத்தில் பார்ப்பனப் பிள்ளைகளுக்கும் , பார்ப்பனர் அல்லாத பிள்ளைகளுக்கும் தனிப்பந்தி வைத்து உணவிடுவதை அறிந்தார் .
அதற்கு ஆதரவளித்த தேசபக்தர் வ.வே.சு. ஐயரின் செயலைப் பெரியார் கண்டித்தார் .
காங்கிரஸ் இயக்கத்தவர் வருணாசிரமத்தையும் சாதிப் பாகுபாட்டையும் கண்டிக்காத செயலை வெறுத்த பெரியார் காங்கிரசை விட்டு வெளியேறினார் .
பெரியாரின் முயற்சியில் சுயமரியாதைச் சங்கம் தோன்றியது .
பெரியார் தோற்றுவித்த ' குடி அரசு ' இதழ் சாதி மத எதிர்ப்பு , கடவுள் எதிர்ப்பு , வருணாசிரம எதிர்ப்பு ஆகியவற்றைத் தீவிரமாக வெளிப்படுத்தியது .
பாரதிதாசன் இந்த இதழால் கவரப்பட்டார் .
சுயமரியாதை வீரரானார் .
1938-இல் குடி அரசு ஏட்டில் பெரியார் ,
" தோழர் பாரதிதாசன் அவர்கள் தமிழ்நாட்டிற்குப் புதியவரல்ல .
அவர் சென்ற பத்து ஆண்டுகளாகச் சுயமரியாதை இயக்கத்தில் தீவிரமாய் ஈடுபட்டு வருகின்றார் .
மனித சமுதாயத்தின் ஒற்றுமைக்கும் முன்னேற்றத்திற்கும் சந்தோஷ வாழ்க்கைக்கும் இன்றியமையாத புரட்சியான பல சீர்திருத்தங்களை ஆதரிப்பது மட்டுமன்றி , அவைகளை ஜன சமூகத்தில் பல வழிகளிலும் பரப்ப வேண்டுமென்ற ஆசையைக் கொண்டவர் .
சிறப்பாகவும் சுருக்கமாகவும் கூற வேண்டுமானால் , பாரதிதாசன் அவர்கள் சுயமரியாதை இயக்கத்தின் ஒப்பற்ற கவி என்றுதான் கூறவேண்டும் "
என்று எழுதியுள்ளதைக் கவிஞரின் மகனார் மன்னர் மன்னன் தம் நூலில் எடுத்துக் காட்டியுள்ளார் .
நெருப்பில் துடித்திடும் மக்கட் கெல்லாம் நல்ல காப்பு - நல்கும் நீதிச் சுயமரியாதை யென்னும் குளிர் தோப்பு .
என்று சுயமரியாதைப் பெருமையைப் பாரதிதாசன் பாடுவார் .
1.4.1 ' குடி அரசு ' உண்டாக்கிய மாற்றம்
கடவுள் நம்பிக்கை கொண்டவராகவும் , கதரே உடுத்தும் தேசபக்தராகவும் விளங்கிய பாரதிதாசனைச் சுயமரியாதை வீரராக்கியது பெரியாரின் ' குடி அரசு ' ஏடு. புதுவையில் நடந்த சுயமரியாதைப் பொதுக் கூட்டத்திற்கு வந்த பெரியாரைப் பாரதிதாசன் பாட்டு வரவேற்கின்றது .
சுயமரியாதைப் பெயர்கொள் பயிர்செழிக்கத்
தொண்டு செய்யும் இராமசாமித் தலைவா !
என்று பெரியாரைப் போற்றும் கவிஞரின் கவிதை ' குடி அரசில் ' வெளியிடப்படுகின்றது .
கடவுளர்களைப் பாடுவதைக் கவிஞர் அறவே விட்டு விட்டார் .
1929ஆம் ஆண்டில் அவரிடம் இம்மாற்றம் ஏற்பட்டிருக்கின்றது .
" சாதி வேற்றுமை சமய வேற்றுமை இவற்றை அறவே ஒழிக்க வேண்டுமானால் குடியரசின் கொள்கைகளை அஞ்சாது கொள்ளத்தான் வேண்டும் "
என்று கவிஞர் கூறினார் .
கவிஞருக்கு ஊரில் இதனால் பெரும் எதிர்ப்பு ஏற்பட்டது .
அதை அவர் பொருட்படுத்தவில்லை .
1.4.2 ' புதுவை முரசு '
.
சிவப்பிரகாசம்
கவிஞர் சுயமரியாதைக் கருத்துகளைப் பறைசாற்ற சிவப்பிரகாசம் , நோயெல் என்ற நண்பர்களோடு சேர்ந்து ' புதுவை முரசு ' என்ற இதழைத் தொடங்கினார் .
இவ்வேட்டில் பல புனைபெயர்களில் தலையங்கம் , கவிதை , கட்டுரை , நூல் மதிப்புரை ஆகியவற்றைக் கவிஞர் எழுதினார் .
இவ்வேட்டில் வெளிவந்த ஒரு கட்டுரை காரணமாகக் கிறித்துவப் பாதிரிமார்கள் வழக்குத் தொடுத்தனர் .
இப்பத்திரிகைக்குச் சில காலம் குத்தூசி குருசாமியும் பூவாளூர் பொன்னம்பலனாரும் ஆசிரியராக இருந்ததுண்டு .
அரசின் நெருக்கடிக்கு உள்ளாகி இவ்வேடு நிறுத்தப்பட்டுவிட்டது .
1.4.3 திரைப்பட உலகில் சுயமரியாதைக் காற்று
தொடர்ந்து பல இதழ்களில் எழுதிவந்த பாரதிதாசனைத் திரை உலகம் அழைத்தது .
ஒளவை டி.கே. சண்முகம் அவர்களின் வற்புறுத்தலால் , ' பாலாமணி அல்லது பாக்தாத் திருடன் ' படத்திற்குக் கவிஞர் பாடல்கள் எழுதினார் .
அதற்குப் பிறகு தேசபக்தர் வ.ரா.வின் அழைப்பின்பேரில் ' ராமானுஜர் ' படத்திற்கு உரையாடலையும் பாடல்களையும் வரைந்தார் .
அவ்வளவு விருப்பமாக இப்பணியை அவர் செய்யவில்லை .
எனினும் , பின்னர் மாடர்ன் தியேட்டர்ஸ் உரிமையாளர்கள் எடுத்த படங்களில் எழுதப்பட்ட பாடல்கள் வழியாக அவர் புகழ்பெற்றார் .
தட்டிப் பறித்தார் என்வாழ்வை என்று தொடங்கும் திரைப்பாட்டு இதோ ஒலிக்கிறது பாருங்கள் !
பாரதிதாசன் பணியாற்றிய திரைப்படங்கள் மற்றும் பாடல்களின் தொகுப்பு
1.5 காலத்தை மாற்றிய கருத்துப் புயல் E
பாரதிதாசன் தோன்றிய காலத்தில் தமிழகம் பழமையின் பிடியில் இருந்தது .
மூடப்பழக்கங்கள் , சாதிமத வேறுபாடுகள் , தீண்டாமை , மதுப்பழக்கம் , பெண்ணடிமை , இளமை மணம் , கைம்மைப்பழி ஆகிய பல தீமைகள் சமுதாயத்தின் குரல்வளையை நெரித்துக் கொண்டிருந்தன . தீண்டாமை
பெண்ணடிமை இளமை மணம்
எத்தனையோ இயக்கங்கள் தோன்றி வளர்ந்தும் இவற்றை மாற்ற முடியவில்லை .
எத்தனையோ முற்போக்குச் சிந்தனையாளர்கள் சமூகத்தை மாற்ற முயன்றும் முடியவில்லை .
கவிஞர் சுப்புரத்தினம் புரட்சிக் கவிஞர் பாரதிதாசன் ஆனார் .
மதுப்பழக்கம்
இருட்டறையில் உள்ளதடா உலகம் சாதி
இருக்கின்றது என்பானும் இருக்கின்றானே !
என்று மனம் நைந்தார் .
நைந்து வருந்தி மனம் சோம்பிடவில்லை .
" கொலைவாளினை எடடா " என முழங்கினார் .
மரத்துப்போயிருந்த தமிழர்களைக் கனல் தெறிக்கும் கவிதைகளால் துடித்தெழச் செய்தார் .
என்று மனிதனின் உள்ளத்தில் ஓர் இயக்கத்தை ஏற்படுத்தினார் .
மனிதர்களில் உயர்வு தாழ்வு , மேல் கீழ் கற்பித்துச் சமூகத்தில் குப்பை எண்ணங்களும் கழிவு வேலைகளும் மலிந்த காலத்தில் கவிஞர் ஒரு புலவராக உருக்கொண்டார் ; மொழி நடையில் ஒரு மின்வேகம் ; கருத்தில் ஒரு புத்தொளி ; பார்வையில் ஒரு தொலைநோக்கு ; செயலில் ஒரு புரட்சி முதலியவற்றைக் கொண்ட கவிஞரால் சமூகம் ஒரு புதிய திருப்பத்தை எய்தியது .
1.5.1 மூடநம்பிக்கை எதிர்ப்பு
மூடநம்பிக்கை
சோதிடம் தனை இகழ் என்றார் பாரதி .
மனிதர்கள் இகழ்ந்தனரா ?
ஒருநாளில் இராகு காலம் , யமகண்டம் என வேலை செய்யாமல் இருக்கும் நேரத்தை வளர்த்தனர் .
சூலம் , அட்டமி , நவமி எனப் பயணத்திற்கு ஆகாத நாட்களெனக் கூறி இயங்காமல் சோம்பிக்கிடக்கச் செய்தனர் .
செவ்வாய் , வெறுவாய் எனக் கிழமையை ஒதுக்கினர் .
ஆனி , பங்குனி குடிபுகக் கூடாது எனப் புறக்கணித்தனர் .
' பூனை குறுக்கே வந்தால் போகும் காரியம் பாழ் ' என்றனர் .
எண்ணெய் கொண்டு எதிரே வந்தால் செல்லும் செயல் கைகூடாது எனக் கணித்தனர் .
தும்மினால் , தொடங்கிய செயல் அழிந்தது எனக் கருதினர் .
மனிதரில் சிலரைத் தொட்டால் தீட்டு என்றனர் .
சொர்க்கம் , நரகம் என்ற இரண்டு உலகங்கள் உள்ளன என்றும் மனிதர் செய்யும் புண்ணிய பாவங்களுக்குத் தகுந்தாற்போல இறப்புக்குப்பின் அங்குப் போய்ச் சேர்வர் என்றும் பகர்ந்தனர் .
ஏழு பிறவிகள் இருப்பதாக நவின்றனர் .
இவ்வாறு பகுத்தறிவுக்கு ஒவ்வாத எத்தனையோ நம்பிக்கைகளை நாட்டில் விதைத்து வளர்த்தனர் .
இவற்றைப் பாரதிதாசன் கடுமையாக எதிர்த்தார் .
என்று குழந்தைக்குப் பாடும் தாலாட்டிலேயே புரட்சிப்பண் பொருத்தினார் .
மூட நம்பிக்கைகளை வாழ்நாள் முழுவதும் அவர் கடுமையாகச் சாடினார் ; அம்முயற்சியில் வெற்றியும் கண்டார் .
1.5.2 இன உணர்வும் மொழிக்காப்பும்
சாதிமத வேறுபாடுகள்
தமிழன் என்ற இன உணர்வைப் பாரதிதாசன் வளர்த்தார் .
பிற பண்பாடுகளால் சீர்குலைந்து சிதையாதவாறு தமிழ்ப்பண்பாடு காக்கப்பெற வேண்டும் என அவர் முழங்கினார் .
தமிழர்களிடையே உள்ள வேறுபாடுகள் மறைந்து தமிழர் அனைவரும் ஒன்றுபட வேண்டுமென அவர் உரைத்தார் .
இனத்தைச் செய்தது மொழிதான் ; இனத்தின்
மனத்தைச் செய்தது மொழிதான் .
என்று அவர் பாடுகின்றார் .
தமிழ் இனம் உலகில் புகழ்பெற்ற இனமாக வேண்டும் என்பது அவர் அவா .
தமிழ் மொழியைக் காப்பதற்காக அவர் களம் புகவும் சிறை செல்லவும் தயங்கவில்லை .
வேற்றுமொழிகளின் ஆதிக்க வேரைக் கல்லி எறியும் முயற்சியில் அவர் தலைநின்றார் .
இதோ இந்த இசைப்பாட்டைக் கேளுங்கள் !
1.5.3 புதியதோர் உலகம் செய்தவர்
அறிவியல் நோக்கு மலிந்த இக்காலத்தில் பழைமைகளும் , மூடநம்பிக்கைகளும் , பகுத்தறிவு அற்ற எண்ணங்களும் மண்டிக்கிடக்கும் சமுதாயமாகத் தமிழ்ச் சமுதாயம் ஆகிவிடக்கூடாது என்பதற்காக அவர் எழுத்தின் ஒவ்வோர் அணுவையும் பயன்படுத்தினார் .
குடிக்கவும் கூழ் இன்றி இருக்கும் ஏழைக் கூட்டம் ஒருபுறம் ; பாலும் தேனும் தெவிட்டப் பஞ்சணையில் உருளும் செல்வர் கூட்டம் மறுபுறம் .
வானுயர்ந்த மாளிகைகளில் வாழ்வோர் ஒருபுறம் ; நடைபாதைகளில் நலிவோர் மறுபுறம் .
பாழ்நிலத்தைப் புதுக்கிப் பக்குவம் செய்தவர்கள் ஒருபுறம் ; அதில் வசதியாய் உட்கார்ந்து பஞ்சாங்கம் படிப்போர் மறுபுறம் .
கல்பிளந்து மலைபிளந்து கனிகள் வெட்டிக் கருவியெலாம் செய்து தந்தோர் ஒருபுறம் ; அவற்றைப் பயன்படுத்திக் களிப்போர் மறுபுறம் . காட்சி
மூச்சடக்கி முத்தெடுப்போர் ஒருபுறம் ; அதை மாலையாக்கி அணிந்து பகட்டுவோர் மறுபுறம் .
இந்த நிலை நீக்கப்பட வேண்டாமா ?
எல்லாரும் இந்நாட்டு மன்னர்தாமா ?
இதோ அதற்குத்தான் முழங்குகிறது பாருங்கள் புரட்சிக் கவிஞரின் குரல் !
1.6 தொகுப்புரை
எத்தனையோ கவிஞர்கள் இந்த நாட்டில் பிறந்தார்கள் !
அவர்களில் பலர் கால வெள்ளத்தின் போக்கில் வசதியாய்க் கப்பல் ஓட்டினார்கள் .
புரட்சிக்கவிஞர் சமுதாயக் கடலில் , கொந்தளிக்கும் எதிர்ப்பு அலைகளுக்கிடையே கவிதைக் கட்டுமரத்தை அஞ்சாது செலுத்திய ஆண்மையாளராகத் திகழ்ந்தார் .
கொள்கை வெறியும் செயல்திறனும் மிக்க அவர் பாடல்கள் தமிழரின் இதயச் சுவர்களில் என்றென்றும் ஒலிக்கும் !
தன் மதிப்பீடு : வினாக்கள் - II
1. கடவுளைப் பாடும் நிலையிலிருந்து பாரதிதாசன் எந்த ஆண்டில் மாறினார் ?
[ விடை ]
2. கவிஞர் தொடங்கிய இதழின் பெயர் யாது ?
[ விடை ]
3. பாரதிதாசனைத் திரைப்பாடல் எழுத முதலில் அழைத்தவர் யார் ?
[ விடை ]
4. பாரதிதாசன் காலத்தில் நிலவிய மூடநம்பிக்கைகளைக் குறித்து எழுதுக .
[ விடை ]
பாரதிதாசனின் சமுதாயம்
2.0 பாட முன்னுரை
சமூகம் என்பது ஓர் அமைப்பு .
அது யாராலும் உருவாக்கப்படாமல் தானே அமைவது .
ஒரு சமூகம் உருவாக ஒத்த மனத்தினராக மனிதர் நெருங்கி வரவேண்டும் .
ஒரு பொதுமை கருதி ஒருவர்க்கொருவர் விட்டுக் கொடுக்க வேண்டும் .
தத்தம் விருப்பு வெறுப்புகளை விட்டு ஒரு குறிக்கோளைக் கருதி ஒன்றிணைய வேண்டும் .
அதுவே சமூகம் ; அதுவே சமுதாயம் .
விலங்குகளுக்குக் கூட்டமே உண்டு ; சமூகம் , சமுதாயம் என்ற அமைப்பு அவ்வுலகில் இல்லை .
சமூகம் என்பதற்குத் திரண்டது என்பது பொருள் .
பாலில் வெண்ணெய் திரள்வது போல மாந்தரிடையே சமூகம் உருவாகும் .
சாதி சமய அடிப்படையிலான சமூகங்கள் உயர்ந்தன அல்ல ; உயர்ந்த கருத்தின் அடிப்படையில் உருவாகும் சமூகங்கள் வையத்தை உய்விக்கும் .
இந்தியச் சமுதாயம் சிதறிக் கிடந்தது ; மாநிலங்களாய்ப் பிரிந்து கிடந்தது ; மதங்களால் போரிட்டுக் குலைந்தது .
அடிமை இருளில் அறியாமைச் சேற்றில் புதைந்து கிடந்தது .
அதனை ஒருமைப்படுத்த ‘ விடுதலை ’ என்னும் குறிக்கோள் தோன்றியது .
இந்தியச் சமுதாயம் தோள்தட்டி ஆர்த்தது .
விடுதலை பெற்றது .
உரிமை வாழ்வு மலர்ந்தது .
உரிமை பெறு முன்பு இந்தச் சமூகம் எப்படி இருந்தது தெரியுமா ?
உப்புக் காய்ச்சுவதற்காகப் போராட ஓடுகிறது பாருங்கள் மக்கள் திரள் !
உண்ணா நோன்பிருந்து நைகிறது பாருங்கள் !
இப்படிப் போராடிக் கொண்டிருந்தது ஒரு சமூகம் .
அதன் மற்றொரு பகுதி எப்படி இருந்தது ?
இதோ பாரதியார் கூறுகிறார் கேளுங்கள் !
நெஞ்சு பொறுக்கு திலையே - இந்த
நிலைகெட்ட மனிதரை நினைந்து விட்டால்
அஞ்சி அஞ்சிச் சாவார் - இவர்
அஞ்சாத பொருளில்லை அவனியிலே
வஞ்சனைப் பேய்கள் என்பார் - இந்த
மரத்தில் என்பார் ; அந்தக் குளத்திலென்பார்
துஞ்சுது முகட்டி லென்பார் மிகத் துயர்ப்படுவார் எண்ணிப் பயப்படுவார்
( பாரதியார் பாடல் , பாரத ஜனங்களின் தற்கால நிலை : 1-8 )
இப்படித்தான் மூடநம்பிக்கைகளில் ஆழ்ந்து கிடந்தது நாடு .
இதனை அகற்றத் தோன்றியவரே புரட்சிக் கவிஞர் பாரதிதாசன் .
இது , “ மடமைச் சேறு எழுந்திரு வெளியே வா ஒளியை நோக்கிய உன் பயணம் தொடங்கு , ” என்று அறிவுறுத்திய பாவேந்தரல்லரோ அவர் ?
2.1 பாரதிதாசனின் சமுதாயம் - ஒரு விளக்கம்
E
• வறியவர் நலிவும் உடையவர் கொள்ளையும்
வறுமைப் பிடியில் சிக்கிச் சீரழிந்து கொண்டிருந்தது தமிழ்ச் சமுதாயம் .
வறுமைக் கோட்டுக்குக் கீழே , மிகக் கீழே கோடிக்கணக்கான மக்கள் நைந்து நலிந்தனர் .
சிலர் மட்டும் செல்வராய் , நில உடைமை கொண்டவராய் , குறுநில மன்னராய்த் திகழ்ந்தனர் .
வறுமைச் சமூகத்தின் உழைப்பைச் சுரண்டிச் செல்வச் சமூகம் கொழுத்தது .
வறியோர் எலியாக முயலாகக் கிடந்தார்கள் .
அஞ்சிக் கிடந்த அவர்களைப் புலிவேடம் போட்டு மேலும் அச்சுறுத்தினார் முதலாளிமார்கள் .
நாலுபேர் கைகளில் கருவி ஏந்திப் பாறைகளைப் புரட்டுகின்ற காட்சி
அதோ நாலுபேர் வெயிலில் வேர்வை அருவிகள் பெருகக் கைகளில் கருவி ஏந்திப் பாறைகளைப் புரட்டுகின்றனர் பாருங்கள் .
அவர்களின் குழிந்த வயிறு , ஒட்டிய கன்னங்கள் , உலர்ந்த விழிகளைப் பாருங்கள் .
ஆனால் அங்கே குடைபிடித்துக் கொண்டு ஒருவர் கொழுத்த உடலோடு நிற்பதைக் காணுங்கள் !
இந்தக் காட்சியைக் காணும் கவிஞனின் உள்ளம் கொதிக்கின்றது .
இந்தச் சமுதாயம் மாற்றப்பட வேண்டுமெனக் கருதுகின்றார் .
கூழுக்குப் பற்பலர் வாடவும் சிற்சிலர்
கொள்ளையடிப்பதும் நீதியோ ? - புவி
வாழ்வதுதான் எந்தத் தேதியோ ?
( சாய்ந்த தராசு : 5-7 , முதல் தொகுதி )
• சமத்துவம் சாத்தியம்
உலகம் இப்படியே இருந்துவிடாது என்றும் அவர் கருதுகின்றார் .
ஏழை கோழையாக இருக்கும் வரைதான் இந்த நிலை இருக்கும் .
அவன் தாழ்ந்து குனிந்து பணிந்து வாழும் நிலையிலிருந்து நிமிரும் நிலை வரும் .
அப்படி நிமிர்ந்தால் ஒரே நொடியில் உலகம் மாறிவிடாதா எனக் கேட்கின்றார் .
கையிலே திருவோடுதான் உண்டு என்று கூறும் ஓடப்பர் ஒருபுறம் ; செல்வநிலையின் உச்சியிலே இருக்கும் உயரப்பர் மற்றொருபுறம் .
ஏழையப்பராக இருக்கும் ஓடப்பரும் , உயரப்பரும் ஒன்றாக முடியுமா ?
முடியும் என்கிறார் கவிஞர் .
ஓடப்ப ராயிருக்கும் ஏழையப்பர்
உதையப்ப ராகிவிட்டால் ஓர்நொடிக்குள்
ஓடப்பர் உயரப்பர் எல்லாம் மாறி
ஒப்பப்பர் ஆய்விடுவார் உணரப்பா நீ !
( உலகப்பன் பாட்டு : 37-40 , முதல் தொகுதி )
அடி , உதை என்றாலே அஞ்சுவோர் கீழோர் அல்லவா ?
அந்த நிலையிலேதான் இவர்கள் சுரண்டிச் சுருட்டி வைத்திருக்கும் செல்வத்தைப் பிறரோடு பகிர்ந்து கொள்வார்கள் .
இயந்திரத்தில் இட்டுப் பிழிந்தால்தானே கரும்பு சாறுதரும் ?
உலகம் வழங்கும் உடைமை எல்லாம் பொது எனும் மனநிலை வரவேண்டுமென்று பாரதிதாசன் கருதுகின்றார் .
பொருளாதார நிலையில் ஒரு சமத்துவம் நிலவும் சமுதாயத்தையே அவர் காண விரும்பினார் .
• வறுமையின் காரணம்
நெருப்பில் கூடக் கண்மூடித் தூங்கலாம் ; வறுமை வசப்பட்டவன் தூங்க முடியாது என்றார் திருவள்ளுவர் .
கல்லுக்குள் வாழும் தேரைக்குக் கூட உணவு கிடைத்துவிடுகிறது ; அருகம்புல்லுக்குக் கூட இயற்கை ஓர் ஆடையைச் சுற்றியிருக்கிறது .
ஆனால் ஏழை மாந்தர்தம் நிலை என்ன ?
கந்தை அணிந்தோம் - இரு
கையே விரித்தெங்கள் மெய்யினைப் போர்த்தோம்
மொந்தையிற் கூழைப் - பலர்
மொய்த்துக் குடித்துப் பசித்துக் கிடந்தோம் ( தொழிலாளர் விண்ணப்பம் : 33-36 , முதல் தொகுதி )
